ထိုင်းနိုင်ငံမှာ ဆန္ဒပြပွဲတွေဖြစ်နေတဲ့ ဘန်ကောက်မြို့နဲ့ ဘန်ကောက်မြို့ အနီးက မြို့တချို့ကို အရေးပေါ် ကြေညာချက် ထုတ်ပြန်ဖို့ အစိုးရ ဝန်ကြီးများ အစည်းအဝေးက ဆုံးဖြတ်လိုက်ပါတယ်။ အရေးပေါ် ကြေညာချက်ဟာ မနက်ဖြန် စတင်မှာ ဖြစ်ပါတယ်။
အရေးပေါ် ကြေညာချက်အရ ဆန္ဒပြသူတွေကို လူစုခွဲခိုင်းဖို့နဲ့ ဆန္ဒပြသူတွေကို ဖမ်းဆီးနှိမ်နင်းဖို့အတွက် ရဲနဲ့ စစ်တပ်ကို ဝန်ကြီးချုပ်က တာဝန်အပြည့် ပေးခွင့်ရှိသွားပြီ ဖြစ်ပါတယ်။
အစိုးရက အကြောင်းပြတာက ဆန္ဒပြနေသူတွေကို ဥပဒေအရ တားမြစ်တာ အရေးယူတာတွေ လုပ်နိုင်ဖို့ ဖြစ်တယ်လို့ ဆိုပါတယ်။ ဆန္ဒပြပွဲက ၃ လ နီးပါး ရှိနေပြီး ရပ်ဆိုင်းမယ့် အနေအထား မရှိသေးတာ၊ ဖေဖေါ်ဝါရီလ ၂ ရက်နေ့ ရွေးကောက်ပွဲကို ဆန္ဒပြသူတွေက ပိတ်ဆို့ဖို့ ရှိတာနဲ့ လာမယ့် တနင်္ဂနွေနေ့မှာ ကြိုတင်မဲပေးတာကိုလည်း ပိတ်ဆို့ဖို့ ရှိနေတာတွေကြောင့် အခုလို အစိုးရက အရေးပေါ် ကြေညာချက် ထုတ်ပြန်တယ်လို့ ဆိုနိုင်ပါတယ်။
အရေးပေါ် ကြေညာချက် သတင်းထွက်လာပေမယ့် ဆန္ဒပြသူတွေကတော့ လူစုခွဲဖို့ မရှိဘူးလို့ အခိုင်အမာ ပြောနေပါတယ်။
ပြီးခဲ့တဲ့ ဆန္ဒပြပွဲတွေတုန်းကလည်း အရေးပေါ် ကြေညာချက် ထုတ်ပြန်ပေမယ့် ဆန္ဒပြပွဲတွေ ရပ်သွားတာ မတွေ့ရဘဲ အင်အားသုံးပြီး ဖြိုခွင်းမှသာ လူစုခွဲလို့ ရခဲ့တာ ဖြစ်ပါတယ်။
အင်အားသုံးတာကို စစ်တပ်အနေနဲ့ သဘောမတွေ့ဘူးလို့ ကြည်းတပ် ဦးစီးချုပ်က အကြိမ်ကြိမ် ပြောနေတယ်။ ဒါကြောင့်ဆန္ဒပြပွဲတွေ ချက်ချင်း ရပ်အောင်တော့ လုပ်နိုင်ဦးမှာ မဟုတ်ပါဘူး။
No comments:
Post a Comment